Yaliyomo katika Jukwaa la YouTube kama Wenzo wa Kufundishia Kiswahili katika Elimu ya vyuo vikuu: Ushahidi kutoka Chuo Kikuu cha Kibabii, Kenya

Abstract

Makala hii ililenga kuchunguza upatikanaji wa YouTube katika ufundishaji wa Kiswahili, kubainisha matumizi yake katika ufundishaji huo, na kuchunguza yaliyomo kwenye YouTube kama chombo cha kufundishia Kiswahili katika Chuo Kikuu cha Kibabii. Utafiti ulitokana na matumizi ya teknolojia za kidijitali zinazobadilisha mbinu za ufundishaji na ujifunzaji katika vyuo vikuu, huku YouTube ikitokea kama moja ya majukwaa yanayotumika kwa upana kusambaza maudhui ya kielimu. Utafiti uliongozwa na mkabala mseto wa mbinu sambamba. Data za kiai zilikusanywa kutoka kwa wahadhiri 10 na wanafunzi 87 kwa kutumia hojaji. Aidha, video 44 za YouTube zilizotumika kama zana za kufundishia Kiswahili zilifanyiwa uchambuzi wa maudhui. Washiriki waliteuliwa kwa kutumia mbinu za usampulishaji za nasibu na za kimakusudi kulingana na sifa za makundi husika. Data za kiasi zilizopatikana zilichanganuliwa kwa takwimu za maelezo (masafa na asilimia), huku data za ubora na maudhui ya video zikifanyiwa uchambuzi wa dhamira na uchambuzi wa maudhui. Matokeo yalionyesha kuwa YouTube inapatikana na kutumika kwa kiwango kikubwa katika ufundishaji wa Kiswahili, na ina maudhui yanayohusiana na matamshi, sarufi, msamiati, fasihi na mawasiliano ambayo huongeza uelewa wa wanafunzi, ushiriki wao na ujifunzaji wa kujitegemea. Makala hii inahitimisha kuwa YouTube ni chombo muhimu cha kufundishia Kiswahili ikiwa maudhui yake yatahifadhiwa na kutumika kwa mujibu wa malengo ya ufundishaji. Utafiti unachangia maarifa kuhusu matumizi ya YouTube katika ufundishaji wa Kiswahili unaonyesha kuwa ubora wa maudhui, ulinganifu wake na mtaala, pamoja na uwezo wa walimu kuyachagua na kuyatumia kwa ufanisi, ndizo nguzo za matumizi yenye tija ya YouTube katika elimu ya vyuo vikuu.